Mayor Joe Espinosa, may ginapilian na nga mga pangalan sang bag-o nga grandstand sa dalan Muelle Loney

Iloilo City— Ginklaro ni Atty. Hernando Galvez, city administrator nga isa lang ka desinyo ang ginsumiter para sa bag-o nga grandstand.

Suno sa iya, wala sang iban nga design sila nga nabaton.

Ang kasubong nga desinyo suno kay Galvez amo man ang gin-upod sa bidding documents kag bidding contracts.

Ang pag-athag ginhimo ni Galvez matapos naglapta sa social media nga wala nasunod ang desinyo sa bag-o nga grandstand.

Nagabalor ini sang P45-million nga gin-obra sang Gurrea Construction.

Ginpa-athag sang City Engineer’s Office nga ang mga naglapta nga pictures online indi amo ang opisyal nga desinyo kundi unsolicited proposal lamang.

Dugang pa ni Galvez, gin-athag gid sadto ni Mayor Joe Espinosa nga temporaryo lang ang pagtawag niya sa bag-o nga grandstand bilang “Dinagyang Grandstand.”

Nahibaluan suno kay Galvez sang alkalde nga ang istruktura mahimo lang hingalanan sang konseho paagi sa ordinansa, paagi sa act ukon presidential proclamation.

Lakip naman sa mga proposals nga ipangalan sa bag-o nga grandstand ang “Graciano Lopez Jaena Grandstand,” “Rodolfo Ganzon Grandstand,” “New Freedom Grandstand” kag “Ramon L. Muzones Grandstand” nga sunod sa ginhingadlan nga national artist. (AGB/MO)