Mga kiosko naplastar na sa Jaro plaza; Peryahan, naplastar naman sa porsyon sang karsada bisan wala pa na-aprubahan sang city government

Iloilo City — Naplastar na ang mga kiosko sa sulod sang Jaro plaza kag ang peryahan sa sidewalk kag porsyon sang karsada bisan wala pa naaprubahan sang city government.

Base sa Executive Order Number 001 series of 2019 ni Mayor Joe Espinosa, dapat mag-coordinate si Balantang, Jaro Punong Barangay Jerel Agilles sa city government paagi sa Public Safety and Transportation Management Office antes iplastar ang “fair” sa mga open spaces sa Jaro.

Dugang diri, dapat man ini nga aprubahan san PSTMO antes magsugod.

Si Agilles ang gin-designate ni Mayor Espinosa bilang manager sang 2019 Jaro Agro-Industrial and Charity Fair.

Una na ginpahayag ni PSTMO Head Jeck Conlu nga nakaistorya sa iya mga personnel si Agilles angut sa fair sang nagligad nga semana apang wala pa sila sang pinal nga desisyon.

Nagpamalibad nga magpa-interview si Agilles apang nagpasalig nga magsabat sa iya press conference buwas, Enero 15.

Bisan wala pa na-aprubahan, magapabilin ang peryahan kag mga kiosko bangud naplastar naman sila suno kay Conlu.

Epektibo halin Enero 4 tubtob Pebrero 9 ang Jaro Agro-Industrial and Charity Fair. (JoMaque)