Plano sa Jaro Agro-Industrial and Charity Fair, indi pag-aprubahan kon wala sang pagbag-o –PSTMO Head

Iloilo City – Posible nga indi pag-aprubahan ni Public Safety and Transportation Management Office (PSTMO) Head Jeck Conlu ang plano sa Jaro Agro-Industrial and Charity Fair kon wala sang may bag-uhon.

Base sa Executive Order nga ginpaguwa ni Mayor Joe Espinosa, dapat nga aprubado sang PSTMO ang plano sang mga aktibidad. Ginpabutyag ni Conlu nga wala siya ginkonsulta antes ang pagplastar sang mga kiosko kag peryahan sa Jaro Plaza.

Suno kay Conlu, bwas (Enero 15), masapol sila ni Balantang, Jaro Punong Barangay Jerel Agilles, in-charge sang Jaro Agro-Industrial and Charity Fair, agud liwaton ang plano. Pero kon wala sang may bag-uhon, indi ini pag-aprubahan sang iya opisina.

Ginpanindugan ni Conlu nga prayoridad niya ang seguridad sang publiko, ilabe pa nga ara sa higad sang national highway ginpahamtang ang mga kiosko kag peryahan.

Magluwas diri, indi man niya luyag nga magtuga sang huol sa mga commuters kag motorista ang amu nga aktibidad. (JoMaque)