Deped-Division of Iloilo, nagalaum nga maaktuhan ang ila budget request antes ang 2019 WVRAA

Iloilo – Nagalaum si Mr. Gilbert Solidum, head sang School and Operations Divisions sang DepEd Division of Iloilo, nga maaktuhan sang Sangguniang Panlalawigan ang budget request nila para sa mga atleta sang Iloilo sa 2019 Western Visayas Regional Athletics Association (WVRAA) Meet.

Masobra P20 million ang ginhingyo nga budget sang DepEd Division of Iloilo nga na-aprubahan na sang Local School Board apang kinahanglan pa ang approval sang SP.

Sa flag ceremony sa provincial capitol kahapon, Enero 14, gin-anunsyar ni Governor Arthur Defensor nga posible maapektuhan ang request sang DepEd bangud wala pa mapasar sang SP ang 2019 Annual Budget sang probinsya. Base sa Local Government Code, indi makatalakay sang iban nga agenda ang SP magluwas sa annual budget sa sulod sang 90 ka adlaw samtang wala pa ini mapasar. (JoMaque)