Ilonggo seaman, 4 iban pa, missing gihapon matapos nasunog ang ila barko sa Hawaii

Iloilo–(UPDATE) Gintadlong sang pamilya sang Ilonggo seaman nga gin-report missing matapos nasunog ang ila barko upod sa apat ka iban pa nga wala pa gihapon nakit-an ang ila himata.

Enero 3 sang ginkumpirmar sang pamilya ni Verney Depositario, 31 sang Bolilao, Dumangas nga na-rescue ang seaman matapos nasunog ang barko nga Sincerity Ace sa kadagatan sang Hawaii sang New Year’s eve.

Suno sa amay nga si Pedro, base sa mga pictures nga kuha samtang ginarescue ang mga crew sang barko, nakita niya nga isa sa mga gin-rescue ang iya bata.

Pero sa pinaka-ulihi nga impormasyon subong nga adlaw, Enero 15, ginkumpirmar ni Dionisia Depositario, bayaw ni Verney, nga wala pa gihapon sila sang update sa kahimtangan sang seaman.

Suno sa iya, sala ang impormasyon nga nabaton ni Pedro.

Ginpatawag naman sila sa opisina sang kompaniya ni Verney sa Manila sang Enero 8 kag ginpahibalo nga missing gihapon ang Ilonggo seaman.

Sa website sang Department of Foreign Affairs, gin-post kahapon, Enero 14 ang parte sa natabu sa lima ka Pinoy seamen.

Nagalaum ang DFA nga makita pa ang lima bisan duha ka semana na ang nakaligad sang naglumpat sila sa barko.

“The DFA Office of Migrant Workers Affairs has been informed by the ship’s manning agency that a tugboat and another vessel had been sent to the area to locate the five. The 16 other Filipino seafarers were rescued by the United States Coast Guard and other passing merchant vessels. Most of them have since returned to the Philippines,” suno sa DFA bulletin.

Halin sa Japan padulong sa Hawaii ang Sincerity Ace karga ang 3, 500 ka bag-o nga salakyan sang nasunog nga nagpuwersa sa mga crew nga mag-abandon ship.

May 21 ka crew ang Panamanian vessel.

Si Verney ang ika-anum sa pito ka mag-ulutod.

April 2018 sang nagsakay sa barko si Verney kag manaog na kontani subong nga Enero. (JoMaque)