Pagbutang sang mga kiosko sa porsyon sang karsada sa guwa sang Jaro Plaza, illegal suno kay Councilor Joshua Alim

Iloilo City— Wala nagakomporme si Councilor Joshua Alim sa pahayag ni Councilor Eduardo Peñaredondo nga madula ang popularidad sang Jaro fiesta kun wala na sang mga kiosko sa plaza.

Suno kay Alim, matuod nga nagapasadya ang mga kiosko kag peryahan pero dapat nga ibutang sa insakto nga lugar kag indi sa dalanon nga maka-perwisyo sa iban.

Para kay Alim, illegal ang pagbutang sang perya sa dalan.

Sa Executive Order nga ginpapanaug ni Mayor Joe Espinosa nga naga-designar kay Balantang, Jaro Punong Barangay Jerel Aguilles bilang in charge sa Jaro Agro-Industrial Fair, nabutang nga mahimo magpamutang sang mga kiosko pero wala nalakip dire ang pagpasira sang dalan para butangan sang kiosko.

Ginkakas na kahapon, Enero 15, sang Public Safety and Transportation Management Office (PSTMO) ang perya sa karsada sa guwa sang Jaro Plaza. (AGB/MO)