Punong barangay, nagsabat sa reklamo batuk sa baho halin sa iya truck nga nagahakut sang food waste

Iloilo City— Indi na pag-i-park ni Calubihan, Jaro Punong Rodney Guintibano ang iya truck sa taytay malapit sa barangay hall sang Taft North, Mandurriao.

Desisyon ini ni Guintibano kasunod sang reklamo nga ginpalab-ut sa Aksyon Radyo sang indi maayo nga baho kon aga sa service road.

Suno kay Guintibano, mga bilin nga pagkaun sang fast food chain sa Mandurriao ang iya ginahakut kag ginapatinluan man sa iya mga tinawo ang truck. Gin-ako niya nga gina-park kon gab-i ang truck sa taytay pero ginakuha man kon aga.

I-park niya na lang ang truck sa gina-arkilahan niya sa Calahunan, Mandurriao. (AGB)