150 barangays sa Iloilo City, fire prone areas – BFP

Iloilo City – 150 ka mga barangays ang gintumod nga fire prone areas sa syudad base sa ginpaguwa nga listahan sang Bureau of Fire Protection-Iloilo City.

Suno kay City Fire Marshal Chief Inspector Christopher Regencia, naga-egsister ang amu nga listahan bisan sang indi pa siya ang city fire marshal.

Lakip sa mga factors nga ginbasehan agud makabig nga fire prone ang isa ka lugar amu ang mga ikit-ikit ang mga balay, human sa light materials ang balay, makitid ang alagyan nga indi gilayon masulod sang fire trucks kag manubo ang mga wirings sang kuryente kag linya sang telepono.

Gin-validate suno kay Regencia sang mga district supervisors sang BFP sa siyudad ang listahan sang mga barangays.

Ginsumiter man ang listahan sa city government kag ginpahibalo ang barangay officials sa mga barangay nga nalakip sa listahan.

Ginbuyagyag ni Regencia nga nagapangbalay-balay man sila agud panugyanan ang mga pumuluyo sa dapat himuon kon may sunog pero 30 tubtob 40 porsyento sa 150 ka barangay lang ang nagapati sa ila panugyan.

Ginpasiguro ni Regencia nga nagahimo pa sila sang mga tikang agud mapasangkad ang kampanya kag malikaw sa sunog ang mga pumuluyo.

Nalakip sa listahan sang BFP ang Barangay Taal, Molo sa diin 30 ka balay ang nasunog sang Lunes sang gab-i, Enero 14. (JoMaque)