ArchivesLokal

4 police officials nga ginhingadlan ni Presidente Duterte nga may kaangtanan sa illegal drugs, ginapa-report sa Camp Crame sang PNP Chief

Iloilo City— Ginapa-report ni PNP Chief Director General Oscar Albayalde sa Camp Crame ang apat ka mga anay police officials sa Bacolod City Police Office nga ginhingadlan ni Presidente Rodrigo Duterte nga may kaangtanan sa illegal nga druga.

Suno kay Police Regional Office 6 Spokesperson Supt. Joem Malong, may instruction si Albayalde nga sa Personnel Holding and Accounting Unit (PHAU) sa Camp Crame ma-report sanday S/Supt Francisco Ebreo, anay acting director sa BCPO; P/Supt Allan Macapagal, anay deputy city director for administration; Supt. Ritchie Yatar, anay chief sang Mobile Force Company, kag Senior Inspector Victor Paulino, former chief sang Police Station 3 sa BCPO.

Matapos nagsapol ang mga natungdan upod kay PRO 6 Director Chief Superintendent John Bulalacao kay Presidente Duterte sa Malacañang sang Enero 15, sa PHAU na sila nag-report suno kay Malong.

Gin-relieve sang PRO 6 ang mga natungdan sang Enero 12 kag gin-reassign sa Regional PHAU kasunod sang anunsyo sang presidente.

Enero 13 sang nagmandu ang Camp Crame nga ma-report ang nasambit nga mga police officials kanday Albayalde kag Duterte.

‘IT IS NOT INSTANT’

Ginpa-athag ni Malong nga indi gilayon ‘dismissed’ ang mga pulis nga ginhingadlan sang presidente bangud kinahanglan sila hatagan sang due process.

Wala naman sang ihatag nga assignment sa mga natungdan samtang nagapadayon ang imbestigasyon.

Suno kay Malong, command activities kasubong sang pag-account kag parade lang ang ila mahimo .

Padayon naman ang pagbaton nila sang sweldo samtang wala pa natapos ang imbestigasyon.

Ginakuhaan pa sang Aksyon Radyo Iloilo sang pahayag ang mga natungdan. (AGB/ATT)

Leave a Reply