5 police officials nga ginlawag ni Presidente Duterte nga may kaangtanan sa illegal, gin-imbestigaran kag gin-lifestyle check na – PRO 6 Director John Bulalacao

Iloilo City – Gin-imbestigaran kag gin-lifestyle check na ang lima ka mga police officials nga ginhingadlan ni Presidente Rodrigo Duterte may kaangtanan sa illegal nga druga.

Ini ang ginkunfirmar ni Police Regional Office 6 PCSUPT Director John Bulalacao kasunod sang ‘private meeting’ sang natungdan nga mga pulis sa presidente sa Malacañang kahapon, Enero 15.

Posible iban nga unit sang Philippine National Police (PNP), Armed Forces of the Philippines (AFP) ukon National Bureau of Investigation (NBI) ang nag-conduct sang imbestigasyon kag lifestyle check suno kay Bulalacao.

Matandaan, gin-anunsyar ni Presidente Duterte sa iya speech sa Bacolod City sang Enero 12 nga may kaangtanan sa illegal nga druga sanday Police SSupt Francis Ebreo , Police Supt. Allan Macapagal ; Police Supt. Richie Yatar , Police Supt. Nasrruddin Tayuan kag Police Senior Inspector Victor Paulino.

Gin-relieve ang mga natungdan kag gin-assigned sa Regional Personnel Holding and Accounting Unit sa Kampo Delgado.

‘ANO ANG SPECIFIC NGA INVOLVEMENT?’

Katuyuan sang imbestigasyon suno kay Bulalacao nga mahibaluan ang specific involvement sang mga natungdan sa illegal nga druga.

Ginkunfirmar naman ni Bulalacao nga na-angut na sadto sa illegal nga druga kanday PSUPT Macapagal, PSUPT Yatar kag PSI Paulino rason ginpa-idalum sa Focused Reformation/ Reorientation and Moral Enhancement for Police Officers.

Nakahibalo si Macapagal suno kay Bulalacao nga nalakip siya sa High Value Target ukon HVT list apang nagbalik sa gihapon sa ginpahayag illegal drug trade base man sa mga reports nga nabaton sang presidente. (JoMaque)