BFP-Iloilo City, maga-deploy sang fire trucks sa mga ginakonsiderar strategic areas sa highlights sang Dinagyang

Iloilo City — Maga-deploy sang fire trucks ang Bureau of Fire Protection (BFP) Iloilo City  Fire Station sa mga ginakonsiderar nga strategic areas sa syudad para sa highlights sang Dinagyang Festival 2019.

Suno kay Senior Fire Officer 3 (SFO3) Aquilino Sampiano, chief operations officer sang Iloilo City Fire Station, napulo ka mga firetrucks ang ila deploy sa syudad agud madasig sila nga makaresponder kon may fire call.

Wala na suno sa iya sang may mabilin nga fire trucks sa ila headquarters sa duha ka adlaw nga highlights sang Dinagyang bangud mabudlay maguwa ang salakyan kon siraduhan ang dalan malapit sa bag-o nga grandstand.

Iga-deploy ang fire trucks sa Fort San Pedro area; Rizal Street, City Proper; likod sang Judging Area Number 2 sa Provincial Capitol kag Ledesma Street, City Proper.

Dose ka barangay sa syudad ang ginakonsiderar sang Iloilo City Fire Station nga high risk areas — Calaparan, Arevalo; Baluarte, San Juan, Calumpang, West Habog-Habog kag North Habog-Habog, Molo; Sinikway, Lapuz; Rizal Lapuz Sur; General Hughes, Veterans, Concepcion kag Rizal Pala-Pala 2, City Proper. (JoMaque)