(UPDATE) Counter-affidavit sang mag-utod nga Roy kag Rey Julius Delos Reyes nga suspek sa pagpatay kay Mercedes Nava, human na suno kay Councilor Plaridel Nava

Iloilo City— Human na ang counter affidavit sang mag-utod nga Roy kay Rey Julius De los Reyes, mga suspects sa pagpatay kanday Mercedes Nava kag Erwin Fontillas.

Ang De los Reyes brothers ang ginpahayag sakay sa motorsiklo nga nagtiro sa mga biktima sa Calahunan, Mandurriao sang Enero 4 sang aga.

Ang mga De los Reyes nagatrabaho bilang bodyguards ni Councilor Plaridel Nava.

Buwas, Enero 18, magatakop ang 10 ka adlaw nga ginpangayo sang kampo sang mag-utod para maka-file sila sang counter affidavit.

Ginkasuhan ang duha sang murder para sa pagpatay kay Mercedes Nava.

Suno kay Councilor Nava, may apat sila ka testigo nga nagalakip sang taxi driver nga yara sa crime scene sang adlaw nga ginpatay ang mga biktima. Ang driver suno sa konsehal ang magapamatuod nga indi makita ang nawong sang gunman bangud natabunan. Wala man suno sa witness nakakas ang mask nga tabon sa nawong sang gunman. Una na ginpahayag sang testigo sa pagpatay kay Mercedes nga nakakas ang mask sang gunman kabangdanan iya nakita ang nawong.

Ang ikaduha nga testigo naman ang magapamatuod sa solid alibi ni Roy De los Reyes nga wala siya sa crime scene sang ginpatay si Mercedes kundi yara sa karinderya sa iban nga lugar.

Ang ikatatlo nga testigo maga-testify naman sa alibi ni Rey Julius nga wala man siya sa crime scene. Si Rey Julius ang nakita sang isa pa ka testigo sang pulis nga nagsakay sa motorsiklo upod sa isa pa, kag nagsunod sa salakyan ni Mercedes malapit sa balay sang biktima.

Tuman ka hina suno kay Councilor Nava sang ebidensiya kontra kay Rey Julius bangud lunsay circumstantial.

Ginpahayag ni Councilor Nava nga magatestigo man siya agud bali-un ang pahayag sang police parte sa hot pursuit operation. 

Kun basehan ang affidavit sang mga testigo kag pulis suno kay Councilor Nava, nagapakita nga Enero 4 pa lang may positive testimony na sila sang testigo. Nahibaluan sang mga police suno sa konsehal nga bodyguard niya ang mga De los Reyes kag dapat ginkadtuan na nila ang duha kun nakilala na sila. Nalipatan suno sa konsehal sang mga police nga sa ila blotter, nabutang nga sang Enero 4 kag 5, wala sila sang lead kag wala pa sang suspek sa krimen. (AGB/MO)