Porsyon sang SM City Iloilo sa Diversion Road, Mandurriao, nasunog kagab-i

Iloilo City — Napuhag ang mga shoppers, customers kag naga-obra sa SM City sa Diversion Road, Mandurriao sang nagtub-ok ang madamol nga aso halin sa kalan-an nga Ribshack mga alas-otso kagab-i, Enero 17.

Gilayon nga ginpaguwa ang tanan nga tawo sa sulod sang mall samtang nagresponder ang taga-Bureau of Fire Protection kag nagkalain-lain nga fire volunteer brigade.

Nakita naman ang pag-ibwal sang kalayo sa roof top nga tadlong sang Ribshack.

Sa pagpangusisa ni City Fire Marshal Fire Chief Inspector Christopher Regencia, gindakup sang kalayo ang natipon nga tambok sang ginaluto sa kalan-an gani nasunog kag nagkarab-karab ang chimney.

Ginabanta sa P200,000 ang kahalitan sa sunog.

Ginpanugyanan naman sang BFP ang management sang mall nga i-implementar ang regular nga pagtinlo sang chimney sang mga kalan-an nga may ginaluto sa mall agud indi na maliwat ang natabu.

(Ariel Solacito)