(UPDATE) Anay Iloilo City Mayor Jed Patrick Mabilog, indi makapauli sa lubong sang iya iloy

Iloilo City— Indi magpauli si anay Mayor Jed Patrick Mabilog sa syudad para sa lubong sang iya iloy.

Ini ang ginkumpirmar sang utod sang former mayor nga si Mr. JV Mabilog.

Wala na naghatag sang dugang nga detalye si JV kun ano ang rason kun ngaa indi magpauli ang anay alkalde.

Dugang pa niya, maumpisa ang hamyang sang ila iloy nga si Melchorita Escalante Mabilog karon sa gab-i, Enero 18, sa Molo Church Mortuary.

Gintalana ang lubong sa Enero 26, las-2:30 sa hapon.

Sa iya Facebook account, nag-post sang pangamuyo si anay mayor Mabilog kag nagpasalamat sa mga nagpalab-ut sang mensahe sang kasubo sa iya pamilya.

Si Mabilog ang paborito sadto nga imitlang ni Presidente Rodrigo Duterte sa iya mga speeches matapos naangut ang ngalan sang alkalde sa illegal nga druga.

Wala na nakapauli si Mabilog sa siyudad halin sang nagpadulong siya sa abroad upod sa iya pamilya matapos siya nalawagan sang presidente.

2017 sang gin-dismiss si Mabilog sang Ombudsman bangud sa indi niya mapa-athag nga manggad. (AGB/JV)