25 anyos nga lalaki, nabun-an patay sang ginatudlo karelasyon sang iya iloy sa Barotac Viejo; suspek, nadakpan

Barotac Viejo, Iloilo– Patay ang 25 anyos nga si alyas Mike matapos ginbuno sang ginatudlo kerido sang iya 45 anyos nga iloy mga las 12 kaina sang kaagahon, Enero 19.

Ginkilala ang suspect kay Albert Barreto, 27 anyos, residente man sang amu nga barangay.

Suno kay PCINSP Joven Arevalo, hepe sang Barotac Viejo Police Station, mga las 11:45 kagab-i, Enero 18, nakita ni Mike nga nagtabuay ang iya iloy kag si Barreto sa kamalig nga ginabanta may 150 metros ang kalayuon sa ila balay.

Ginpukaw ni Mike ang iya tiyo nga si Ed kag ginhagad nga makadtu sa kamalig. Una nga nagsulod sa kamalig si Mike samtang nabilin sa gwa si Ed.

May nabatian nga gahod sa sulod sang kamalig si Ed gani nagsulod siya kag nasugata ang suspect nga si Barreto.

Ginlagas pa ni Ed ang suspetsado apang nakabatyag siya sang paghapdi sa iya kilid kag nakita nga may pilas siya.

Nagbalik sa payag si Ed kag naabtan nga nagahapa-on na ang iya hinablos nga si Mike kag may pilas sa sentro sang dughan.

Ginhingagaw dala sa ospital ang mag-tiyo apang wala na natabangan si Mike.

Mga las 11 kaina sang aga, Enero 19, nadakpan ang suspek sa Barangay Natividad sa bulig sang mga barangay officials. Ginrason niya nga gindepensahan lang ang iya kaugalingon.

Posible suno kay PCINSP Arevalo nga may komosyon nga natabu sa tunga nanday Mike kag Barreto bangud may pilas sa ulo ang suspetsado.

Wala nahibaluan kun diin nagkadto ang iloy ni Mike nga si Ivy nga nagpalagyo man pagkatapos sang insidente.

Wala narecover ang kutsilyo nga gingamit sang suspek sa krimen. Tagub na lang ang narecover sang kapulisan sa crime scene. (AGB/JGM)