Pagpa-iway sang traditional nga ‘Pasungay Festival’ sang San Joaquin subong nga adlaw, temporaryo –LGU

San Joaquin, Iloilo–Temporaryo lang ang desisyon sang local government unit nga indi pagdayunon ang ginahulat sang mga pumuluyo nga “Pasungay Festival” nga natalana kuntani subong nga adlaw, Enero 19.

Suno kay SB Member Joe Abad, bisan masubo, nagdesisyon si Mayor Ninfa Garin nga indi pagdayunon ang ginabantayan nga pasungay sang mga karabaw.

Ini makaligad nagguwa ang mga reklamo angut sa animal cruelty sa pagpasungay sang sapat.

Suno kay Abad, sa iya pagkahibalo, wala sang napatay nga karabaw ukon baka bangud sang festival nga nangin kabahin na sang kustombre sang mga taga-San Joaquin.

Tiempo Katsila pa suno kay Abad sang ginsuguran nila ang pasungay sang mga sapat.

Sa kada festival suno sa iya, may nakastandby man nga mga beterinaryo agud masiguro ang kaluwasan sang mga sapat.

Kun lantawon ang kasuguan, ginpahayag ni Abad nga nasaad lang dire ang parte sa dog fight kag horse fight pero luyag nila nga magpaniguro kabangdanan wala gindayon ang pasungay.

Ginpasiguro naman ni Abad nga indi sila mag-untat sa pagpakigbatu agud madayon ang festival.

Sa post sa Facebook sang Animal Kingdom Foundation, ginpahayag nga makabig nga “cruelty” ang ginahimo sa mga sapat.

Yari ang post sa FB sang Animal Kingdom Foundation:

“In Iloilo, #bullfights are still held at present times as part of an old religious tradition. The festival called#Pasungay, involves bulls and horses that are pitted against each other for sake of entertainment. It’s not a ’fight to the death’ match per se, but there is still clear cruelty involved.

Under the current Animal Welfare law, animal fights — including horses and bulls, are seen as cruel acts, and are hence prohibited, with heavy fines and sanctions for violators.

Abusing animals will not bring honor to any culture. Stop using tradition as an alibi.” (AGB/MO)