PECO, magapadayon sa pagtrabaho bisan expired na ang franchise – VP for operations

Iloilo City (UPDATE) – Wala sang pag-untat sa serbisyo sang Panay Electric Company (PECO) bisan expired na ang ila franchise sugod subong nga adlaw, Enero 19.

Suno kay Engr. Randy Pastolero, Vice President for Operations sang PECO, may clearance halin sa Department of Energy (DOE) ang ila pag-operate samtang wala pa masolbar ang isyu sa franchise.

Sige sa pagtrabaho ang ila mga personnel suno kay Pastolero kag indi sila mag-untat sang operasyon kon wala sang mandu halin sa proper authority.

Gin-athag man ni Pastolero nga wala sang basehan sa subong ang ‘transition period’ bangud wala pa man mapirmahan ni Presidente Rodrigo Duterte ang franchise sang MORE Electric and Power Corporation. Magluwas sini, may mga legal options ang PECO.

Wala nagahulag sa House Committee on Legislative Franchises ang application for franchise renewal sang PECO samtang ara na sa Office of the President ang franchise bill sang MORE.  (JoMaque)