(UPDATE) 45 anyos nga iloy sa Barotac Viejo, wala nakapauli matapos napatay sang iya karelasyon ang iya bata

Barotac Viejo, Iloilo — Wala sang ideya ang pamilya kon diin nagkadtu ang 45-anyos nga iloy nga nagpalagyo matapos nabun-an patay sang iya karelasyon ang iya bata nga lalaki sa Barangay San Geronimo sang Enero 19 sang kaagahon.

Suno kay alyas Yan-Yan, ikaduha nga anak ni alyas Juvy, wala na nakapauli ang ila iloy pagkatapos sang krimen.

Gin-ako ni Yan-Yan nga nabatian nila ang huring-huring sa ila barangay nga karelasyon sang ila iloy si Albert Barreto, 27 anyos nga suspek sa pagpatay sa iya magulang nga si alyas Michael, 25 anyos, pero wala sila sang ebidensya.

Ginsuknaan man nila ang iloy apang naga-deny kag nagapangakig kon pamangkuton.

Nagsugod suno sa iya ang relasyon sang ila iloy kag ni Barreto sang nagmasakit ang ila amay nga si alyas Doydoy, 38 anyos, nga ila ginpa-untat sa pagpanguma bangud pirme lang nagakalipong.

Gindala ni Juvy sa pagpalagyo ang 11 anyos niya nga bata nga babaye.

Preso naman sa Barotac Viejo Police Station si Barreto kag natalana nga pasakaan sang kaso. (AGB)