4 anay police officials sa Bacolod City nga ginhingadlan ni Presidente duterte nga ‘narco cops,’ ginpatawag sa NAPOLCOM 6

Iloilo City – Ginpatawag ni National Police Commission ukon NAPOLCOM 6 Director Atty. Joseph Celis sa iya opisina ang apat ka mga anay police officials sa Bacolod City Police Office nga ginhingadlan ni Presidente Rodrigo Duterte nga may kaangtanan sa illegal nga druga.

Suno kay Director Celis, ginpangayuan sang ila bahin ang mga natungdan angut sa akusasyon batuk sa ila ni Presidente Duterte.

Una na ginreport nga imbestigaran sang NAPOLCOM 6 ang ginpahayag kaangtanan sa illegal nga druga nanday PSSUPT Francisco Ebreo, PSUPT Allan Macapagal, PSUPT Ritchie Yatar kag PSI Victor Paulino.

Gintinguhaan sang Aksyon Radyo Iloilo nga makuhaan sang statement ang mga natungdan apang nagpamalibad sila.

Suno kay Celis, nagahulat ang mga police officials sang direktiba ni PNP chief Director General Oscar Albayalde angut man sa ila imbestigasyon.

Gin-relieve kag ginre-assign ang gintumod nga mga opisyal sa Regional Personnel Accounting and Holding Unit. Suno kay PRO 6 Spokesperson Supt Joem Malong, ‘floating’ ang status sang nasambit nga mga police officials samtang wala pa sang resulta ang imbestigasyon. (JoMaque)