Iloilo City – “Daw mga hari, poderoso kag daw gina-hostage sang mga kapitan sa Jaro nga identified Congressman Jerry Treñas.”

Ini ang pahayag ni Mayor Joe Espinosa matapos ang mga kontrobersiya sa Jaro Fiesta pareho sang pagpahamtang sang perya, indi paghatag sang awtoridad sa Jaro ABC kag ang ginpahayag pag-boycott sang mga kapitan sa parada sa opening sang Jaro Agro-Industrial and Charity Fair sang Sabado, Enero 19.

Suno kay Espinosa, paghingabot ang ginaubra sang mga kapitan sa Jaro kag wala man sang binuligan kundi mag-criticize sa iya .

Gusto man suno as iya sang mga kapitan nga isabotahe ang Jaro Fiesta matapos ginpangkuha sang Association of Barangay Captaions (ABC) Jaro ang mga bangko kag gin-boycott ang parada matapos nagsapol sa ila ang chief of staff sang kongresista nga si Jonas Belosillo.

Dugang pa sang alkalde, gusto sang mga kapitan nga siya pa ang mapaubos kag gusto man nila nga pakahuy-an siya.

Paathag sang ABC-Jaro

Ginarespeto ni Association of Barangay Captains (ABC)- Jaro District President Leo Lindero ang pahayag ni Mayor Espinosa

Ini ang may kaangtanan sa Jaro Agro-Industrial and Charity Fair para sa nagahilapit nga Jaro Fiesta.

Suno kay Lindero, wala sila nakahibalo sang ila papel sa kahiwatan bangud ginhatag sang alkalde ang otoridad sa pag-manage kay Balantang Punong Barangay Jerel Agilles.

Wala suno sa iya nag-coordinate sa ila si Agilles agud maplastar ang ila mangin papel.

Ginpanginwala man ni Lindero ang akusasyon sang alkalde nga gin-boycott sang mga kapitan nga identified kay Congressman Treñas ang opening sang Enero 19.

Ginpahayag pa ni Lindero nga kon nagapang-sabotahe sila, wala kuntani ginpagamit kay Agilles ang ABC Office sa Jaro Plaza.

Gin-aku man niya nga nakabaton siya sang imbitasyon sa opening pero ulihi na kag wala siya nakapasakop bangud ara siya sa Manila.

Ginpasiguro sang kapitan nga nakahanda man sila nga mag-coordinate sa aktibidad sang Jaro Fiesta kon may imbitasyon sa ila.  (JoMaque)