Pagpanubo sang edad sang criminal liability, ginapamatukan sang CHR 6

Iloilo City— Hugot nga ginapamatukan sang Commission on Human Rights (CHR) ang pagpanubo sa edad sang criminal responsibility halin sa 15 sa 9-anyos.

Suno kay Atty. Jonie Dabuco, OIC sang CHR 6, ang husto nga pagpatuman sang Republic Act 9344 ukon ang Juvenile Justice and Welfare Act of 2006 amo ang solusyon sa problema sa mga menor de edad nga nagakomiter sang krimen.

Ginalantaw sang CHR nga biktima ang mga bata.

Sa laye suno kay Dabuco, nabutang nga dapat may programa pareho sang pagpaidalum sang mga “children in conflict with the law” sa psychological kag psychiatric intervention pero wala ginapatuman.

Sa Iloilo suno sa iya, ang Mina lang ang may center para sa pag-rehabilitate sang kabataan ukon ang Bahay Pag-asa. Sa siyudad naman, makita ini sa Bo. Obrero sa Lapuz pero pribado ang nagapanag-iya kag indi iya sang local government unit.

Importante suno kay Dabuco nga lantawon ang mga factors kun ngaa nangin adik ukon kriminal ang bata.

Ang pahayag ginhimo ni Dabuco matapos nakapasar na sa Kamara ang hagna nga nagatuyo magpanubo sang edad sang criminal responsibility. (AGB/MO)