Cashier sang gasoline station, ginhold-up sa San Dionisio; P130,000 nga cash, tseke kag cellphone, nataban

San Dionisio, Iloilo –Kapin P130,000 nga cash, tseke kag cellphone ang nataban sang mga hold-upper sa cashier sang Total Gasoline Station.

Natabu ang insidente sa Barangay Capinang kahapon sang hapon, Enero 22.

Suno kay PO2 JV Velasco sang San Dionisio Municipal Police Station, naga-sakay sa motorsiklo si Joseph Cacho, 29 anyos sang Concepcion sang ginsabnit sang mga suspetsado nga nakasakay man sa motorsiklo ang iya bag sang nagalabay sa taytay sa nasambit nga barangay.

May kibyas nga pilas sa kamot si Cacho sang ginbuno sang mga suspetsado.

Nagapati si Velasco nga madugay na nga gina-monitor sang mga suspetsado si Cacho nga may dala nga kwarta kon magpa-uli sa ila lugar.

Nabudlayan nga mag-identify si Cacho sa mga suspect bangud may tabon ang ila guya. (JoMaque)