Chairman sang Committee on Appropriations sa city council, nagpangayu sang tiun para tun-an ang request nga P67-million supplemental budget ni Mayor Joe Espinosa

Iloilo City (UPDATE) – Isa ka semana ang ginpangayu ni Committee on Appropriations Chairman City Councilor Plaridel Nava agud tun-an ang gin-request nga P67.8 million pesos nga supplemental budget ni Mayor Joe Espinosa.

Suno kay Nava, gin-refer sa iya komitiba ang request sang alkalde bisan gin-classify ini nga urgent kahapon, Enero 22.

Makadto suno sa iya ang P50-million nga budget sa pagpatindog 5-storey building nga butangan sang command center sang City Disaster Risk Reduction and Management Office (CDRRMO) kag iban pa nga opisina samtang makadto naman ang P17-million sa mga equipment sang CDRRMO.

Madamo pa suno kay Nava sang pamangkot sa request sang alkalde rason nga nagpabor siya nga i-refer sa komitiba.

Wala nalakip ang amu nga pundo sa 2019 budget sang siyudad bangud nalakip na ini sa Supplemental Budget Number 3 sang 2018 nga wala gin-aprubahan sang konseho bangud wala na-justify ang padulongan sang kabug-usan nga pundo.

Gin-athag ni Nava nga pila sa mga concerns sang konsehal ang lokasyon nga patindugan sang building kag presyo.

Pabor si Nava nga tion na agud may command center ang CDRRMO para mapasangkad ang ila serbisyo.

Ginadalian sang city government suno kay Nava ang pundo para indi maabtan sang banning sang Commission on Elections angut sa May 13 midterm elections. (JoMaque)