Mekaniko nga ginpahayag ginhold-up sang 2 riding-in-tandem sa San Miguel, nag-ako sa pulis nga wala siya ginhold-up

Iloilo — Wala ginhold-up ang mekaniko samtang nagasakay sa motorsiklo sa Barangay San Antonio, San Miguel kagab-i, Enero 22.

Ini ang base sa nakuha nga CCTV footages sa mga lugar nga ginlabayan sang biktima.

Suno kay PO3 Art Arthuro, imbestigador sang San Miguel Police Station, ginhimo-himo lang ni Juluis Quebrar, 22-anyos sang Consolacion, San Miguel ang insidente para matabunan ang nagasto niya nga P28,000 para kontani sa kapital sang ila talyer.

Sang nabuking sang mga pulis, gin-ako ni Quebrar nga wala siya ginhold-up.

Una diri, ginpahayag ni Quebrar nga ginbanggaan siya sang duha ka riding-in-tandem samtang nagasakay sa motorsiklo kag gintutukan sang pusil.

Suno kay Quebrar, nag-angkas pa sa iya ang isa sa apat ka suspek kag gindala siya sa Alimodian kag ginlibot-libot sa banwa antes gindiretso sa Rizal, Oton sa diin siya ginpahayag ginbilin kag ang iya motorsiklo.

Pursigido naman magpasaka sang kaso nga unjust vexation si Chief Inspector Jojo Tabaloc, hepe sang San Miguel Police Station bangud sa ginhimo nga pagbinutig ni Quebrar.

Presu na si Quebrar sa karsel sang San Miguel Police Station. (JoMaque)