Pamilya Regalado, mapasaka sang dugang nga mga kaso batuk sa mga personnel sang PDEA 6 kag RDEU angut sa kontrobersyal nga pag-raid sa ila balay

Iloilo City — Ginkunfirmar ni Atty. Marben Lumbo, legal counsel sang pamilya Regalado, nga mapasaka sila sang dugang nga mga kaso batuk sa personnel sang Philippine Drug Enforcement Agency (PDEA) 6 kag Regional Drug Enforcement Unit (RDEU) angut sa kontorbersyal nga pag-raid sa balay sang mga Regalado sa Barangay Sambag, Jaro sang Disyembre 13, 2018.

Suno kay Atty. Lumbo, nakilala na nila ang anum ka personnel sang RDEU kag pito ka personnel sang PDEA 6 apang subject pa sa kunfirmasyon sang nasambit nga mga ahensiya.

Planting of evidence kag robbery ukon theft ang ipasaka sang mag-asawa nga Arnulfo kag Nilda Regalado lakip si Leo Regalado.

Planting of evidence naman ang ipasaka ni Cyril Regalado samtang robbery kag obstruction of justice ang ipasaka sang ila iloy nga Mrs. Candelaria Regalado nga una nagfile sang criminal kag administrative charges batuk sa mga natungdan nga personnel sa Ombudsman.

Mapasaka man sang robbery ang wala ginhingadlan nga miembro sang pamilya Regalado bangud ginpahayag may ginkuha sa iya wallet.

Posible mapasaka ang nasambit nga mga kaso subong nga semana suno kay Atty. Lumbo. (AGB/ATT)