Dalagita, nagpalaminhod ang lawas kag nagpin-ot ang dughan matapos ginpahayag gin-‘injectionan’ sang naka-maskara nga mga lalaki

Sta. Barbara, Iloilo – Nagpalaminhod ang lawas sang 13-anyos nga estudyante nga babaye matapos ginpahayag gin-injectionan sa sulod sang eskwelahan sa Sta, Barbara kaina sang hapon, Enero 23.

Ginkilala ang babaye kay Alyas KS kag Grade 7 student. Nagpanugid suno kay Joanna ang iya bata nga nagapungko ini sa bleacher sa eskwelahan upod ang duha pa ka babaye nga estudyante sang nakita ang tatlo ka lalaki.

Naglakat ang mga upod ni KS gani isa na lang siya sang nagpalapit ang tatlo ka lalaki nga naka-face mask kag naka-kalo. Nakasuksok suno sa iya ang tatlo sang uniform kag ID sang eskwelahan. Ginpahayag nga ginpugos si KS kag gin-injectionan sa tuo nga paa.

Mga las-3:30 sang natabu ang pag-injection kag pasado las-5 sang hapon, nagreklamo ang dalagita nga nagapalaminhod ang iya batiis kag indi mahulag ang mga tiil kag nagapin-ot ang iya dughan gani gindala siya sa Rural Health Unit pero gin-refer sa ospital.

Gina-obserbahan ang estudyante kag posible ipaidalum sa laboratory para mahibaluan kon ano ang gin-inject sa iya.

Nagapati ang iloy nga epekto sang gin-inject sa iya bata ang pagpalaminhod sang iya lawas. (JoMaque)