ICAST, mangdakup sang mga manigarilyo sa #Dinagyang Festival

Iloilo City – Hugtan sang Iloilo City Anti-Smoking Task Force (ICAST) ang pagbantay kag pagpangdakop sa magapanigarilyo sa mga aktibidad sang Dinagyang Festival.

Suno kay ICAST Director Iñigo Garingalao, wala sang ginbutang nga smoking zone sa Dinagyang gani indi gid pwede nga makapanigarilyo bisan diin lang.

Bisan ang mga miyembro sang tribu nga nagapasakop sa Dagyang Tribes Dance Competition, ginabawalan man sa pagpanigarilyo ilabi na sa tion sang pag-blocking.

Sa pagkamatuod suno kay Garingalao, may isa na sila ka tribe member nga nadakpan bangud sa pagpanigarilyo.

Indi lang ICAST ang mangdakup kundi pati man ang mga pulis kag mga volunteer groups.

Multahan sang P1,000 ang madakpan sa first offense; P1,500 sa second offense; kag P3,000 naman sa third offense.  (JoMaque)