(UPDATE) Lalaki nga gintiro patay kag ginhal-id sa Oton, nakilala na

Oton, Iloilo– Ginkilala sang iya manghod ang biktima kay Ronel Batangas, 36-anyos, sang Poblacion South, Oton.

Si Batangas ang gintiro-patay kag ginhal-id sa kilid sang karsada sa Sitio Baras, Barangay Trapiche pasado las otso kagab-i, Enero 27.

Suno kay Realyn, may pilas ang iya magulang sa tuo nga parte sang guya lapus sa likod nga porsyon sang ulo; dughan kag kilid.

Ginpahayag ni Realyn nga talagsa lang nagapauli sa ila balay ang iya magulang pero magluwas sa pag-inom, wala na ini sang iban nga bisyo pareho sang pagdruga ukon sugal.

Gin-ako ni Realyn nga napreso sadto ang iya magulang sa Muntinlupa matapos nakuhaan sang pusil.

2017 sang nakaguwa ang iya magulang kag nagtrabaho bilang trisikad driver kag construction worker.

Ginpahayag naman ni Chief Tanod Reynaldo Aleana sang Poblacion South nga masabad si Batangas kun naka-inom.

Involved man ini sa pagpangwat.

Wala sa listahan sang mga involved sa drugs sa barangay si Batangas. (AGB/MO)