4 balay, nasunog sa Loboc, Lapuz

Iloilo City— Wala sang nasalbar nga kagamitan ang mga nasunugan sa Loboc, Lapuz subong nga hapon, Enero 29.

Nasunog ang balay nanday Lydia Capulot, Nelson Magbanua, Ryan Salvalosa kag Wendy Alabado kag Salvacion ‘Bebing’ Palma.

Ginatudlo nga naghalin ang kalayo sa likod balay ni Capulot pero iya ginpabutyag nga wala man siya sang ginbilin nga dabok. Wala man suno sa iya sang nakasaksak nga appliances kag wala man siya sang ginaluto sa kusina.

Suno kay SFO1 Rolen Hormina sang Bureau of Fire Protection, padayon nila nga gina-imbestigaran ang rason sang sunog.

Nagpasalig naman si Paz Badayos sang City Social Welfare and Development Office nga hatagan sang financial kag food assistance ang mga nasunugan. P7,000 ang batunon sang pamilya nga totally gutted ang balay kag P5,000 naman kon partially-damaged. (AGB)