6-wheeler truck, nahulog sa pil-as sa Igbaras; driver patay, pahinante pilason

Igbaras, Iloilo— Patay ang driver sang 6-wheeler truck samtang pilason ang iya pahinante matapos nahulog sa pil-as ang ila salakyan sa Barangay Igcabugao.

Suno kay Gloria Lacdo-o sang Igbaras Rural Health Office, gindala pa sa ospital si Rafael Loriega, 52-anyos apang napatay.

Suno sa medical intern nga nagresponder sa lugar, may pilas sa tiyan, magtimbang nga kamot kag wala nga paa si Loriega.

Gindala man sa ospital ang upod ni Loriega nga si Jeffrey Invidia nga may pilas sa ulo suno kay Lacdo-o.

Suno kay SPO3 Remus Cabag, imbestigador sa Igbaras Police Station, madul-ong kuntani ang truck sang materyales sang ginpahayag naglagapok ang idalom nga porsyon sini kag indi na makontrol sang driver ang manibela.

Nahulog ang truck sa ginabanta 30 tubtob 50 metros nga kataason sang pil-as. (AGB/ATT)