Operator sang carnival sa Diversion Road, Mandurriao sa diin nahulog sa Ferris wheel ang mag-iloy, wala sang permit – BPLO head

Iloilo City–Wala naka-apply para makakuha sang permit ang Five Star Mobile Carnival Rides nga nag-operate sang carnival sa Diversion Road, Mandurriao.

Nabukaran ini kasunod sang aksidente sang Enero 26 sang nahulog ang mag-iloy sa Ferris wheel.

Suno kay Mr. Norman Tabud, head sang Business Permits and Licensing Office (BPLO) sa City Hall, nakakadto sa ila opisina ang operator para mag-inquire sang mga requirements pero wala na nakabalik.

Illegal suno sa iya ang operation sang carnival bangud wala sang permit.

Madamo man sang papeles nga dapat i-comply ang carnival pareho sang emergency and evacuation plan para mahatagan sila sang clearance halin sa Bureau of Fire Protection, security plan para sa police, structural plan sa City Engineer’s Office kag clearances halin sa ICAST, Task Force on Morals and Values Formation kag Public Safety and Transportation Management Office (PSTMO).

Suno kay Tabud, kun wala nahulog ang mag-iloy sa Ferris wheel, wala man nabukaran nga wala sang permit ang carnival.

Nagapati si Tabud nga may salabton ang operator ilabe na nga may naganar sila sa ila operation nga wala sang permit. 

Ginahulat sang BPLO ang report sang PSTMO nga ila i-endorso sa City Legal Office para sa nagakaigo nga legal action angut sa natabu.

Natukiban man suno kay Tabud nga pareho ang operator sa rides sa Jaro sa naga-operate sang rides sa Diversion Road.

Ginpa-untat na ang operation sang carnival. (AGB/MO)