Muslim leaders kag mga pulis sa Western Visayas, nagsapol sa isyu sang seguridad

Iloilo City — Nagsapol ang kapin 20 ka mga Muslim leaders kag mga pulis sa Police Regional Office 6 angut sa issue sa seguridad.

Suno kay PRO 6 Spokesperson Superintendent Joem Malong, ginahimo ang sinapol kada quarter sang tuig para sa information dissemination kag pagpasangkad sa kooperasyon sang magtimbang nga kampo sa pagmentinar sang kalinong kag katawhay.

Timing ang sinapol suno kay Malong agud madiskusyunan ang twin bombings sa Jolo, Sulu sang Enero 27.

‘SUPORTADO ANG POLICE’

Nagpasalig naman si Faisal Arumpac, chairman sang Federation of Muslim Association in Western Visayas, nga suportado nila ang mga pulis para mamentinar ang kalinong kag katawhay.

Magluwas sa paghatag sang impormasyon, gina-profile man sang asosasyon sang mga Muslim ang kasubong nila nga mga Muslim nga bag-uhanon sa ila lugar.

Paagi sini, ma-monitor ang populasyon sang mga Muslim kag matul-id man ang katuyuan sang mga natungdan sa pagpadulong sa rehiyon suno kay Arumpac.

Suno naman kay Sammy Hadjimanan, spokesperson sang Iloilo United Muslim Community, kapin 30 ka mga Muslim halin sa iban nga lugar ang nagpa-amolya subong sa ila simbahan sa Lapaz bangud nagabaligya sa Jaro plaza.

Na-profile na sila sang IUMC.

‘GINAKONDENA SANG MGA MUSLIM’

Ginakondena naman sang mga Muslim sa rehiyon ang pagpangbomba sa Jolo.

Suno kay Arumpac, indi kahimuan sang mga Muslim ang barbaric nga pagpang-atake sang mga terorista. (AGB/ATT)