WVSU Medical Center chief nga una na gin-report nga nag-avail sang medical assistance program sang gobyerno para sa mga pigado, milyonaryo base sa iya SALN

Iloilo City —Nadiskubrehan nga milyonaryo kag may madamo nga propedad ang medical center chief sang West Visayas State University Medical Center nga una gin-report nag-avail sang P130,000 nga medical assistance bangud ginpahayag indigent.

Base sa Sworn Statement of Assets, Liabilities and Net Worth(SALN) ni Dr. Ramon Guerra Jr sang 2017 nga amo man ang tuig sang nag-avail siya sang medical assistance, naglab-ot sa masobra P58-Million ang iya nga net worth.

May mga residential houses, kaduta-an kag katubuhan, condominiums kag tatlo man ka salakyan si Dr. Guerra nga ginabugusan sang Chrysler- 300z, Toyota – Super Grandia kag Chevrolet- Colorado.

Una na ginreport nga gin-aprubahan sang DOH Central Office ang P50,000 nga medical assistance kay Dr. Guerra.

Ginconfirmar naman ni Dr. Remia Nacanaynay, head sang Medical Assistance Program sang DOH 6, nga may P80,000 man nga medical assistance nga nabaton si Dr. Guerra base sa fund utilization report nga ginsumiter sa iya opisina sang 2017.

Gintinguhaan sang Aksyon Radyo Iloilo nga makuhaan sang pahayag si Dr. Guerra paagi sa iya staff apang wala sang positive response.

Ginapa-imbestigaran na sang pamunuan sang West Visayas State University ang pag-avail ni Dr. Guerra sang medical assistance. (AGB/ATT)