(UPDATE) Suspek sa tuyo nga paghimulos sa 19 anyos nga timbang sang iya pakaisa sa Pavia, napasakaan na sang kaso

Pavia, Iloilo — Napasakaan na sang kaso ang 58 anyos nga lalaki nga nagtuyo maghimulos sa 19 anyos nga timbang sang iya pakaisa sa isa ka subdivision sa  Pavia sang Enero 31.

Suno kay PCINSP Fernand Limbungan, hepe sang Pavia MPS, napasaka kahapon ang kaso sa Provincial Prosecutor’s Office batuk sa suspetsado nga pakaisa sang amo ni alyas Inday sang Dao, Antique.

Una nga gin-report nga bag-o lang nakatapos paligo ang timbang kag naga-ilis na sa sulod sang kwarto sang ginsunod sang lalaki kag ginkup-an.

Ginsugid sang tagreklamo nga ginpasaka sang suspek  ang iya bayo pero wala nadayon ang paghimulos bangud nakapalagyo kag nakapangayo sang bulig ang babaye.

Ginpahayag ni Limbungan nga na-record sang tagreklamo sa iya cellphone ang pagpangayo niya sang tabang kag ang pagpamatuk sa tuyo nga paghimulos sa iya sang lalaki.

Wala sa ila balay ang amo sang babaye sang natabo ang insidente. (AGB)