84-anyos nga lalaki, pilason sang naigo sang bala sa natabu nga pagpangtiro sa Cubay, Jaro

Iloilo City — Pilason ang tigulang matapos naigu sang bala sa natabu nga pagpangtiro sa Sitio Little Janiuay, Barangay Cubay, Jaro kagab-i, Pebrero 2.

Ginkilala ang biktima kay Lito Tapion, 84-anyos nga napilasan sa abaga.

 Suno kay Rene Demandante, apo sang biktima, nagpadulong sa ila balay si Alex Villagracia kag sila ang nag-inom-inom.

Nakibot lang sila suno sa iya nga nagpanghaboy sang botelya si Villagracia kag nagpangtiro. Naigu sa sulod sang kwarto ang tigulang.

Gilayon suno sa iya nga nagpalagyo si Villagracia. Sang nagpadulong na sila sang iya utod sa police station agud magreport, ginpahayag niya nga ginlambatan pa sila sang suspek kag gintiro.

Natumba suno sa iya ang ila motorsiklo kag maswerte nga wala maigu.        Nadakpan naman si Villagracia sa ginhimo nga follow-up operation sang Jaro police.

Sa bersyon naman ni Villagracia, siya pa ang ginpulihan kag ginlampusan sa ulo rason nga napilasan.

Suno sa suspek, nagahampang sila sang pusoy sang may natabu nga indi pag-intindihanay tubtub nga nagpukutay.

Nagpahayag si Villagracia nga naagaw niya ang pusil ni Demandante kag ginpalupok.

Nagapanindugan si Villagracia nga biktima siya sa natabu nga insidente bangud may pilas siya sa agtang, butkon kag bakiras sa lawas.          

Wala na narekober ang pusil. (JoMaque)