Motorsiklo, nakabunggo sa multicab sa Barotac Viejo; 1 na-ospital

Barotac Viejo, Iloilo – Na-ospital ang 23-anyos nga lalaki matapos nakabunggo ang iya ginamaneho nga motorsiklo sa multicab sa Rizal Street, Barangay Poblacion, las-9:40 kagab-i, Pebrero 2.

Suno kay PO3 Rio Don Mitchel Candelario sang Barotac Viejo Police Station, nag-overtake ang motorsiklo nga ginamaneho ni RC Gumban sa ginasundan nga ceres bus. Posible nga wala niya natalupangdan ang kasugata nga multicab nga ginamaneho naman ni Jose Leo de Leon sang Iloilo City rason nga iya nabungguan.

Wasak ang windshield sang multicab kag napilasan naman ang tudlo ni De Leon bangud sa nabuka nga crystal sang salakyan.

May pilas naman sa ulo si Gumban nga gilayon gindala sa ospital. Ginapatihan suno kay Candelario nga naka-inom si Gumban sang natabu ang aksidente. (JoMaque)