LMP-Iloilo Chapter, nagdihon sang resolution nga nagahingyo sa Sangguniang Panlalawigan nga padasigon ang pag-aprobar sang 2019 annual budget sang probinsya

Iloilo — Nagdihon sang resolution ang mga miembro sang League of Municipalities of the Philippines-Iloilo chapter nga nagahingyo sa Sangguniang Panlalawigan nga padasigon ang pag-aprobar sa 2019 annual budget sang probinsya.

Natabu ini sa ginhimo first regular monthly meeting sang LMP-Iloilo chapter sang nagligad nga semana. 

Suno kay LMP-Iloilo chapter President kag Ajuy Mayor Jett Rojas, apektado ang serbisyo sa kabanwahanan sa indi pag-aprobar sang 2019 budget bangud ang mga alkalde ang ginasukot sang mga pumuluyo.

Gin-ako ni Rojas nga wala sang may ihatag ang banwa sa ginapangayo sang mga pumuluyo bangud ginasalig sa provincial government ang pag-release sang pundo.          

Sa 24 ka mga alkalde nga nagtambong sa monthly meeting sang LMP-Iloilo chapter, 18 ang nagpabor sa resolution nga gin-author ni Leganes Mayor Jose Romi Marañon samtang anum ang nagpamatok. (JoMaque)