Mga departamento sa City Government, dapat may tawo nga maproseso sa papeles sang mga job hires – City Administrator

Iloilo City — Ginmanduan ni City Administrator Atty Hernando Galvez ang mga departamento sa City hall nga mag-assign sang tawo nga mag-proseso sang tanan nga papeles sang mga job hires sa tion sang sweldohanay.

Tuyo sini nga malikawan ang delay sa pag-abot sang sweldo kag para may sukton nga tawo kon may problema.

Ginhimo ni Atty Galvez ang announcement sa flag ceremony sang city hall kaina sang aga, Pebrero 4.

Dugang pa ni Galvez, may verbal instruction man sa Internal Audit Office nga i-evaluate kag i-determine ang rason sang pagka-delay sa sweldo kag maghimo man sang mga recommendation kon ano ang mga proper action nga himuon kon may problema sa mga payroll.

Ginpasalig ni Galvez nga pag-abot sang sweldohanay, pirmahan nila ni Mayor Joe Espinosa ang mga dapat pirmahan.

Ginpahayag man niya nga kon may delay sa sweldo sa iban nga mga opisina, dapat i-report gilayon para ma-aksyonan. (AGB)