Incumbent SB member sa Calinog, gindakup matapos nakuhaan sang mga pusil nga wala sang lisensya

Calinog, Iloilo — Gindakop ang incumbent SB Member sang Calinog matapos siya nakuhaan sang pusil sa raid sa iya balay kagab-i, Pebrero 4.

Ginkumpirmar ni PCI Jose Nemias Pamplona, hepe sang Calinog Municipal Police Station nga yara sa custody nila si SB Member Iko Calvo, nagakandidato man sa pagka-mayor sa idalum ni Congressman Ferj Biron.

Ginpahayag ni Pamplona nga nakuha sa balay ni Calvo sa Barangay Libot ang mga pusil nga wala sang lisensiya.

Una nga nakuha ang kalibre .45 kag M16 nga mga pusil kag bala pero natukiban nga may mga lisensiya kabangdanan ginbalik.

Nakuha pa gid ang defective nga caliber .25 kag defective 22 long barrel nga pusil nga wala naman sang lisensiya.

Kasuhan si Calvo sang paglapas sa Republic Act 10591 ukon ang Comprehensive Law on Firearms and Ammunition.

Gintinguhaan sang Aksyon Radyo Iloilo nga makuhaan sang pahayag si Calvo pero nagbalibad pa ini sa pagkomento. (AGB/MO)