NPA kag private armed group nagaserbisyo sa pila ka mga local officials nga nagapapili sa masunod nga eleksyon — PRO 6

Iloilo City — May mga local officials nga nagapadalagan sa masunod nga eleksyon nga nagakuha sa serbisyo sang New Peoples Army kag private armed groups suno kay Police Regional Office 6 Director Chief Superintendent John Bulalacao.

Suno kay Bulalacao, may impormasyon nga may mga congressman, governor, vice governor, board member, mayor kag konsehal nga naga-coordinate ilabi sa mga NPA apang nagapadayon ang ila validation.

Wala gintu-ad ni Bulalacao kun sin-o ang mga natungdan apang ginpahayag may ara sa Negros Occidental kag Iloilo.

May congressman nga nagapadalagan sa pagka-alkalde nga may ‘close coordination’ sa mga miembro sang NPA suno kay Bulalacao.

Dugang niya, may mayor naman nga nag-ako nga mahimo siya mag-avail sa serbisyo sang NPA.

‘FOCUS SA MILITARY OPERATIONS’

Ginavalidate man sang Philippine Army ang amo nga impormasyon suno kay Colonel. Alberto Desoyo, commander sang 301st Infantry Brigade.

Dugang diri, ginahatagan prayoridad sang mga soldado ang focus military operations sa mga lugar nga ginreport may presensya sang NPA suno kay Desoyo.

‘INDI MAGBAYAD’

Nagapahanumdom naman ang Commission on Elections sa mga pulitiko nga indi magbayad sa NPA sang permit to campaign fee kag permit to win fee .

Ini suno kay Atty. Roberto Salazar- Provincial Election Supervisor sa Iloilo.

May impormasyon ang Philippine Army nga may nagapanukot na nga mga NPA member sang permit to campaign fee sa mga kandidato apang ginavalidate pa ini.

Nagapananawagan si Bulalacao sa mga pulitiko nga gilayon nga magreport sa pulis kun may magcoordinate nga NPA ukon private armed group sa ila agud gilayon nga ma-aksyonan. (JoMaque/AT)