Seaman nga taga-Iloilo City, gin-report nga nadula sa kadagatan sang Latvia sa Europe

Iloilo City — Isa na naman ka Ilonggo seaman ang ginreport nga missing.

Suno sa pamilya, wala na nakita si Wilhelm Tabares Mantua, 25-anyos sang Mohon, Arevalo, halin sang gin-report nga nadula samtang nagalayag ang ila barko sa kadagatan sang Liepaja, Latvia.

Sa interview sang Aksyon Radyo Iloilo kay Angelo Mantua, magulang ni Wilhelm, nakabaton sila sang report sang Pebrero 1 sang hapon nga missing ang iya manghod. 

Antes ang report suno kay Angelo naka-video call pa sila sang iya manghod kag wala man siya sang may nasugid nga problema. 

Nakibot na lang sila sang nabaton nila ang report. 

Sakay si Wilhelm sa MV Lady Ami nga may pito ka crew kag bag-o lang halin sa port sang Liepaja sang siya ang na-missing. 

Gilayon suno kay Angelo nga nag-conduct sang search and rescue operation ang mga otoridad para nga makit-an ang iya manghod pero bangud sang tuman ka lamig nga klima, on and off ang operation suno sa iya. 

Sang Pebrero 3 sang gab-i naglakat sa Manila ang iloy kag utod ni Angelo kag nagpadulong sa kompaniya nga gin-aplayan sang iya manghod kag makapangayo sang update.

Tubtob subong, wala gihapon sang klaro nga sabat sa pamilya kun paano nadula ang ila himata. 

Manug-isa na ka tuig halin sang nagsakay si Wilhelm kag mapanaog na kuntani subong nga Pebrero. 

Si Wilhelm ang agot sa lima ka mag-ulutod. 

Sang New Year’s eve, nadula man si Verney Depositario sang Bolilao, Dumangas matapos nasunog ang ginasakyan niya nga car carrier nga Sincerity Ace sa Pacific Ocean..

Antes kay Depositario, gindeklarar nga “man overboard” ang Ilonggo seaman nga si Lude Mar Legario, 25-anyos, sang Walang, Lambunao.

Ginreport nga missing si Legario samtang nagalayag ang ila barko sa Palawan Passage padulong sa Taiwan sang Disyembre 25.

Wala pa nakita sanday Depositario kag Legario. (AGB/MO)