Ginabanta 10 ka pulitiko, gina-monitor sang kapulisan bangud sa report nga naga-hire sang serbisyo sang NPA – IPPO Director

IPPO Headquarters – Nagapati si Iloilo Police Provincial Office (IPPO) Director PSSUPT Marlon Tayaba nga gina-hire sang mga pulitko ang serbisyo sang New People’s Army agud maka-access sila sa ginakabig influenced barangay ukon controlled territory sang mga rebelde sa probinsya.

May impormasyon nga nabaton si Tayaba nga anay miembro sang NPA nga nag-lie low ang ginabayaran sang pulitiko agud mag-upod sa iya.

Wala naman nahibaluan kon pila ang rate nga ginasukot sa mga pulitiko pero may impormasyon nga nagalab-ot sa P100,000 ang ginabayaran nga campaign fee sang mga nagapadalagan sa pagka-mayor.

Kon magpositibo ang validation sa impormasyon suno kay Tayaba, mahimo nga makasuhan ang pulitiko bangud sa pagsuporta sa kawsa sang mga rebelde.

Sa record sang IPPO, ginabanta sa 10 ka pulitiko ang gina-monitor sang kapulisan nga naga-hire sang serbisyo sang NPA. (AGB)