Hustisya, ginapangayu ni Councilor Plaridel Nava sa pagdakop sa iya 2 bodyguards nga wala sang search warrant rason nga nagpasaka sang kaso sa mga pulis

Iloilo City (UPDATE) – Indi luyag ni Councilor Plaridel Nava nga magpadayon ang pagka-abusador sang mga pulis rason nga ginkasuhan niya sa Ombudsman ang 17 ka pulis sang Iloilo City Police Office (ICPO).

May kaangtanan ini sa pagdakop sa iya mga bodyguards nga sanday Roy kag Rey Julius “Tata” delos Reyes, suspects sa pagpatay sa pakaisa sang konsehal nga si Mercedes “Ging-Ging” Nava.

Grave abuse of authority, gross misconduct kag conduct prejudicial to the best of public service ang gin-file sang konsehal sa 17 ka pulis lakip kanday ICPO Director PSSUPT Martin Defensor Jr, Supt. Jonathan Pablito nga hepe sang Police Station 1 kag Chief Inspector Marlon Valencia, hepe sang Mandurriao Police Station.

Suno kay Nava, hustisya ang iya ginapangayu sa ginhimo sang mga pulis nga pagdakop sa iya bodyguards nga wala sang may ginpresentar nga warrant of arrest.

Ginapanindugan sang mga pulis nga kabahin pa sang hot pursuit operation ang pagkadakop sa mag-utod sang Enero 7, 2019 kasunod sang krimen sang Enero 4. Pero suno kay Nava, wala sang personal knowledge ang mga pulis sa identity sang suspek kon basehan ang blotter report sa Mandurriao Police Station.

Wala man nauyunan sang konsehal ang aktwasyon ni Defensor sang gindakop ang iya tinawo bangud nga ginpahayag arogante kag bastos.

Ginakabalak-an sang konsehal nga matabu sa ordinaryo nga pumuluyo ang ginhimo sang mga pulis sa iya.

Ginapanindugan man ni Nava nga planted ang mga ebidensiya nga ginpresentar sang mga pulis. Indi mahimo suno sa iya nga hipsan lang ang ginpahayag pagpang-tanom sang ebidensiya sang mga pulis bangud indi mahimo nga i-tolerar niya ang pagdala sang granada sang iya bodyguards.

Nakilala na ni Nava ang 17 ka mga pulis pinaagi sa kuha sang CCTV cameras sa City Hall. (JoMaque)