Pagkadula sang Ilonggo seaman sa kadagatan sang Latvia sa Europe, nakalab-ut na sa DFA

Iloilo City — Ginkumpirmar ni Mr. John Dan Fajardo, Assistance to Nationals Officer sang Department of Foreign Affairs, nga nakalab-ot sa iya ang impormasyon angut sa Ilonggo seaman nga gin-report nga missing samtang nagalayag ang ila barko sa kadagatan sang Liepaja, Latvia sang Pebrero 1.

Suno kay Fajardo, nagkadtu sa iya ang utod ni Wilhelm Tabares Mantua, 25-anyos sang Mohon, Arevalo kag nagpahibalo sa natabu sa iya manghod.

Nagpadulong man suno sa iya sa DFA central office ang iloy kag isa pa gid ka utod ni Wilhem.

Ginpahayag ni Fajardo nga ang Office of the Undersecretary for Migrant Workers Affairs sang DFA-Manila amu ang naga-assist sa pamilya sang seaman nga nadeklarar nga missing.

Kun makabaton sang amu nga impormasyon, gina-relay ni Fajardo sa DFA kag gina-copy furnish ang embassy ukon konsulado nga may jurisdiction kon sa diin natabu ang insidente

Ang embassy ukon ang konsulado suno sa iya ang nagahimo sang groundwork ukon naga-coodinate sa mga concerned agencies sa lugar para makahatag sang update sa Pilipinas.

Gin-athag ni Fajardo nga indi sila maka-demand nga padasigon ang imbestigasyon kon may mga insidente nga naga-involve sa mga Filipino seafarers gani dependent sila sa imbestigasyon sang mga concerned agencies sa abroad.

Sakay si Wilhelm sa MV Lady Ami nga may pito ka crew kag bag-o lang halin sa port sang Liepaja sang siya ang na-missing.

Sang Pebrero 3 sang gab-i naglakat sa Manila ang iloy kag utod ni Wilhelm kag nagpadulong sa kompaniya nga gin-aplayan sang iya manghod kag makapangayo sang update.

Tubtob subong, wala gihapon sang klaro nga sabat sa pamilya kun paano nadula ang ila himata. (AGB/JGM)