PHO-Iloilo, nagpanugyan sa mga ginikanan nga pabakunahan ang ila kabataan kontra tipdas

Iloilo City — May apat ka mga kumpirmado nga kaso sang tipdas sa probinsiya sang Iloilo halin Enero tubtob subong.

Ini ang ginkumpirmar ni Iloilo Provincial Health Office chief Dr. Patricia Grace Trabado.

May lima pa ka kaso nga pending suno kay Trabado bangud wala pa nakaabot ang resulta sang blood test nga ginpadala sa Research Institute for Tropical Medicine (RITM) sa Manila.

Nalakip ang Western Visayas sa mga rehiyon nga may outbreak sang tipdas sa pungsod.

Matuod suno kay Trabado nga naapektuhan ang National Immunization Program (NIP) kasunod sang Dengvaxia controversy kag may mga ginikanan nga nagpamalibad sa pagpabakuna sang ila kabataan.

Ang measles vaccine ginahatag sa mga bata nga siyam ka bulan ang edad para may proteksyon sa lawas. Ang measles, childhood illness nga matapna gid kun mabakunahan ang kabataan suno pa kay Trabado.

Ang measles, viral infection kag lakip sa mga sintomas ang hilanat, gapula ang mata, gasip-un, ubo kag rashes pero madula kun ang bata mataas ang immune system. Kun pigado ang immune system dire nagasulod ang kumplikasyon nga puwede ikamatay sang bata.

Ginpahayag ni Trabado nga mas manami nga hatagan sang proteksyon ang bata antes pa siya tapikan sang tipdas.

Dugang niya bisan nagaduging ang measles sa palibot kun ang bata may proteksyon, indi siya malatnan.

Ang vaccine para sa measles tinuig na nga ginagamit kag halos natapna na ang kaso pero subong naobserbaran nga naganubo ang coverage bangud sang Dengvaxia issue.

Ginpanugyan ni Trabado sa mga ginikanan nga wala pa nakalab-ut sa isa ka tuig ang ila kabataan nga magbisita lang sa health center agud magiyahan sila kag mabuligan kun paano maproteksyunan ang ila kabataan. (AGB)