Ilonggo seaman nga nahulog sa barko kag na-rescue sa Malaysia, nakaabot na sa Manila

Naka-abot na sa Manila ang Ilonggo seaman nga nahulog sa barko sa Malaysia pasado alas 4 kahapon sang hapon, Pebrero 10.

Naka-confine sa ospital sa Manila si Generoso Gempeson Jr, ang Ilonggo seafarer kag tumandok sang Bacong, Guimbal bilang standard operating procedure sang iya opisina.

Nahulog sa ginasakyan nga barko si Gempeson sa Malacca Strait sa Malaysia sang Pebrero 1, 2019 alas 10:00 sang aga kag na-rescue sang mga crew sang MV Penang Bridge matapos ang masobra anum ka oras nga pagpa-utaw-utaw sa dagat.

May sunburn sa guya si Gempeson kag estable na ang kondisyon.

Mapauli sa Iloilo si Gempeson sa masunod nga mga inadlaw kun matapos ang mga kinahanglan nga proseso sa iya opisina sa Metro Manila. (JoMaque)