Mga preso sa Dumangas MPS, ginpabayad sa medical check up sa Dumangas District Hospital

Iloilo–Nakibot si PCI Jogen Suegay, hepe sang Dumangas Municipal Police Station, sang nahibaluan nga ginsukot sang tag-P75 ang mga detainees nga ginpaidalum sa medical check up sa Dumangas District Hospital ukon ang Ramon D. Duremdes District Hospital.

Suno kay Suegay, ini ang una nga tiun nga ginsukot sila sang ospital para sa medical check up sang mga preso.

Siyam ang nadakpan sang mga pulis sang Pebrero 10, bangud sa illegal gambling sa Barangay Pulao.

Gindala ang mga nadakpan sa ospital para ipa-check up pero natingala ang mga pulis sang nanukot ang nurse nga si Aileen Villareal.

Nakabayad ang iban nga preso samtang ang iban nag-promissory note na lang.

Kagab-i, may nadakpan naman ang Dumangas police kag liwat sila ginsukot sang ER fee nga ginbayaran sang isa sa mga pulis.

Suno kay Suegay, luyag niya lang maathagan kun bala ang ER fee bayaran sang preso ukon sang pulis.

Namangkot man siya sa iban nga pulis angut sini kag dire niya nahibaluan nga wala man sila sadto ginabayad para sa check up sang mga preso.

Ginatinguhaan sang Aksyon Radyo Iloilo nga makuhaan sang pahayag ang tagdumalahan sang ospital. (JoMaque)