Seaman nga gin-alegar nagma-oy arestado matapos nagtapungol, nagsipa kag nagpamuyayaw sa duha ka pulis sa Carles

Carles, Iloilo — Arestado ang 30-anyos nga seaman nga gin-alegar nagmaoy matapos ginreklamo nagtapungol, nagsipa kag nagpamuyayaw sa duha ka pulis sa Barangay Bancal pasado las dose kahapon sang kaagahon, Pebrero 10.

Suno kay Police Senior Inspector Francis Albert Fortunado, hepe sang Carles Police Station, nagresponde ang pulis sa baylehan sa nasambit nga barangay matapos nagmaoy si Chris Villanueva, pumuluyo sang amo nga lugar.

Ginlampos ni Villanueva ang iya kwarta sa lamesa sa sulod sang baylehan suno kay Fortunado kag nagpamuyayaw sa mga pulis matapos gindumilian ang pagdala niya sang makahulubog nga ilimnon sa sulod sang baylehan.

Naghambal pa ang ginareklamo nga sinsilyo lang ang sweldo sang mga pulis sa sweldo nila nga mga seaman suno kay Fortunado.

Samtang ginadala sa Police Station, ginsipa ni Villanueva si PO2 Efraem Bartolome sa tuo nga hita sa sulod sang patrol car.

Nahanog naman ang guya ni PO2 Gilbert Pedroso matapos ginsumbag sang seaman pag-abot sa Police Station.

Nagpangayo sang pasensiya si Villanueva suno kay Fortunado apang desidido ang mga pulis nga magpasaka sang direct assault kag alarm and scandals batuk sa iya.

Nagpamalibad nga maghatag sang pahayag ang ginreklamo nga preso sa Carles Police Station.

Bisperas sang kafiestahan sang amo nga barangay sang nagluntad ang insidente. (JoMaque)