Social media campaign sang mga kandidato sa midterm elections, iga-monitor sang Comelec

Iloilo City — Magasugod na buwas, Pebrero 12, ang campaign period para sa mga nagakandidato sa national elective positions.

May kaangtanan sini, may mga pagsulundan suno kay Atty. Robert Salazar, provincial Comelec Supervisor, sa idalum sang Comelec Resolution 10488 nga naga-implementar sang Republic Act 9006 ukon ang Fair Elections Act.

Nasaad sa resolution suno kay Salazar ang mga listahan sang lawful kag legal campaign materials, kun diin puwede mabutang ang amo nga mga materyales kag mga exemptions.

Magluwas dire suno kay Salazar, sa idalum sang Section 9 sang amo nga resolution, i-monitor sang comelec ang “social media associates” ukon mga “contractors whose primary duty is to promote the election or defeat of any candidate through social media interactions and engagement.”

Ang mga “social media associates” nagalakip sang paid influencers kag supporters kag bisan mga “trolls.”

I-require na ang mga nagakandidato nga magsumiter sang report pareho sang bayad sa serbisyo kasubong sang paghimo sang online post pabor ukon kontra sa kandidato.

Gin-ako ni Salazar nga bag-o ini para sa ila kag ilabe na suno sa iya nga limitado ang ila manpower pero ginapaabot na niya nga mangin basehan ini sang publiko sa ila mga reklamo.

Paagi man sini mamonitor suno sa iya ang gasto sang kandidato

Sa mga campaign materials naman nga nagalapas sa pagsulundan sang Comelec, ginakakas ini sang ahensiya kun accessible sa ila pero kun indi, ginasulatan sang Comelec ang tag-iya sang propiedad ilabe na kun private kag ang kandidato agud kuhaun ang election material.

Pananglitan mapaslawan gihapon ang kandidato nga kakson ang materyal, i-dokumento ini sang Comelec kag kasuhan ang kandidato.

Masugod naman sa Marso 29 tubtob Mayo 11 ang campaign period sa mga local candidates.

Hiwaton ang midterm elections sa Mayo 13. (AGB/MO)