(UPDATE) Seaman sa Carles nga ginreklamo nagsipa, nagpanapungol kag nagbuyayaw sa duha ka pulis, pasakaan sang kaso
Iloilo — Preso gihapon sa Carles Police Station ang 30-anyos nga seaman nga ginreklamo nagtapungol, nagsipa kag nagbuyayaw sa mga pulis sa Carles.
Suno kay Senior Inspector Francis Albert Fortunado, buwas, Pebrero 12, pasakaan nila sang kaso si Chris Villanueva bangud holiday subong.
Direct assault upon a person in authority, alarm and scandal, oral defamation kag iban nga posible mapasaka nga kaso ang i-file batok kay Villanueva suno kay Fortunado.
Natabu ang insidente sa bisperas sang kapistahan sang Barangay Bangcal sang Pebrero 10.
Naakig ang seaman sang ginpunggan siya nga makasulod sa baylehan bangud may bitbit nga ilimnon.
Ginlampos pa niya ang kuwarta sa lamesa kadungan sang hambal sa mga pulis nga nagresponder, nga sinsilyo lang sang suweldo niya ang suweldo sang mga pulis.
Ginsipa ni Villanueva si PO2 Efraem Bartolome sa tuo nga hita samtang yara sa patrol car kag ginsumbag niya sa guya si PO2 Gilbert Pedroso sa police station.
Nagpangayo sang pasensiya ang seaman pero desidido ang mga pulis nga dayunon ang kaso.
Ginpahayag ni Fortunado nga may direktiba halin sa central office nga indi mahimo mag-execute sang affidavit of non-interest kun police ang biktima.
Ginhimo ini suno kay Fortunado kasunod sang natabu sa Guimbal sa diin nabutang sa hot water si Congressman Richard Garin matapos siya gin-akusaran nga nagsakit kay PO3 Federico Macaya. (AGB/MO)